Matthew 13

Witi huwaina 'adi tosaweyana

(Maki 4:1-9; Luke 8:4-8)

1Nage sabweloina 'oina Yesu hadaina 'oinega 'ilatuwa, ma 'idobi holai 'imiyatoiya.

2Ma boda madouna si'autama 'oina, ta 'aigeda waga 'i'aha'ahai 'oina 'igeluwa, 'imiyatoiya, ma boda 'oya'oya sitotoholo. 3Ma he'ita baibaiwana 'i'ebwaediya gwae hegehegediyega, 'igwaeya, “To'abitanoha 'aigeda 'ina tanoha 'itauya, ma witi patuna 'isaweyaneya, 4ta tupwana patuwedi sibe'uwa 'edai, ma 'oinega bwasumo si'itediya, sisuluwa ta si'aidiya. 5Ma tupwana patu bale'u loda'uda'uleina 'oina sibe'uwa, ma muliyetega sibwala mwayamwayauwa, weyahina bale'u 'i'iuna tuwa, 6'oinega hala 'ibwahalidiya ta siwelaiya, weyahina lamudi geya bale'u gogaina siloba.

7“Ma tupwana patu talitali 'oidiya sibe'uwa ma sibwala mahemahetena, ma talitaliyaedi 'ihewaiwaiya, ta 'isahila he'amasidiya. 8Ma tupwana patu bale'u 'ausalana 'oina sibe'uwa, ta sibwalama ta simadouwa ma sihuwa, 'oinega patu huwadi 'adi baibaiwa handeledi, ma tupwana sikisiti, ma wete tupwana teti.

9“Ceguma matenami gwae bewa wahesagohe.”

Gwae hegehegedi 'ina latu huhuna

(Maki 4:10-12; Luke 8:9-10)

10Ta 'ana tomuliyao silatuma ta Yesu sihegwaeya, sigwae, “To'aha weyahina gwae hegehegediyedi bodaedi 'oidiya 'uhe'ita?”

11Ma Yesu 'igwaeya, “Comi Yehoba 'oimiya 'itagwala pwaiya ma 'ina loina 'alona 'ana tosanapuwao, ma bodaedi geya. 12Ceguma taiyawedi gide ma'idi sanapu, nata loheposeyana madou hedade siloba, ma hesi 'eguma taiyawedi geya 'idi sanapumo ma to'aha nuwana 'oidiya 'imiyamiya nata mabwaiyana silohe'waihi. 13Bewa huhuna gwae hegehegediyega yahe'ita 'oidiya, weyahina 'idi 'ebubuna 'oidiyega geya si'ita bwaibwaini, ma wete 'idi hesagoha 'oidiyega geya sisanapu. 14Tomotaedi weyahidi mwalo Aiseya 'ihepwaila nugeta, 'igwae,

‘Cabwa wahehesagoha ma sahena nuwami 'isabwasabwalena. Ma wete wa'e'ebubuna tuwa ma hesi geya wa'ita.
15Weyahina tomotaedi 'idi nuwatuhuwao si'elo'waniya, ma tenadi 'ituiya, ta wete matadi 'igibuwa.
Tabu ta matadiyega si'ita, ma tenadiyega sihesagoha ma sinuwasabwalena, ta 'oiguwa si'ita hila, ma ya'abi hebwebwe'anedi.’
16“Ma 'omi ma'imi yaliyaya, weyahina matamiyega wa'ita'ita ma tenamiyega wahehesagoha. 17Moisa, ginaula bewa wa'ebubudi ta wahesagohedi mwalo palopitao ma todumwaluwao nuwanuwadi madouna ma si'itadi bo sihesagohedi, ta geya silobadi.

Patu 'ana gwae hegehegedi 'ana lihasa

(Maki 4:13-20; Luke 8:11-15)

18“Coinega patu 'ana saweyana 'ana sanapu wahesagohe. 19Ceguma taiya Yehoba 'ina loina tetelina 'ihesagoheyamo, ma geya 'inuwasabwalena, 'abwa togalaina 'inaoma ma gwaeyedi loheya 'atenega 'i'ewayahuledi. Beno patuwedi sibe'uwa 'edai 'adi sanapu.

20“Ma wete patuwedi bale'u loda'uda'uleina 'oina sibe'uwa, taudi tetela bwebwe'ana sihesagoheya, ma ma'idi yaliyaya sitagwala, 21ma geya lamudi 'ipa'ala, 'oinega tuta 'i'iuna tuwa 'oina simiyamiya, ma 'eguma to tuta 'oina tetela bwebwe'ana 'ana hemisa weyahina mwau nuwana hegamwagamwagu siloba sibe'u mwayamwayau.

22“Ma patuwedi talitali 'oidiya sibe'uwa, taudi tetela bwebwe'ana sihesagoheya, ma hesi 'idi nuwatuhu bale'u weyahina ma wete wasawasa 'ana nuwatuhuwao, ma nuwatuhuwedi tetela bwebwe'ana silohe'amasiya, ta geya sawasawahina ma sihuwa.

23“Ma patuwedi bale'u 'ausalana 'oina sibe'uwa, taudi tetela bwebwe'ana sihesagoheya, ma 'ana nuwasabwalena 'oidiya 'imiyamiya, ta huwaidi 'ausala silagudiya. Tupwadi huwaidiyao handeledi, ma tupwadi sikisiti, ma tupwana teti.”

Gwae hegehegedi witi ma 'awata weyahidi

24Gwae hegehegedi 'aigeda wete Yesu 'i'ebwaediya, 'igwae, “Yehoba 'ina loina gide tuwa 'aigeda loheya witi patuna bwebwe'adi 'ina tanoha 'isaweyanediya. 25Ma nihuwana si'eno sinediya, ma 'ana 'aleha 'aigeda 'inaoma tanoha, ta 'awata 'ana 'ita gide witi wete 'isaweyaneya witi moisa 'alona, ma muliyetega 'itauya. 26Coinega mabwaiyadi sibwala ta sihuwa, ma badaina 'ina topaihowao 'awataedi si'ita lobediya. 27Ma topaihowaedi sinaoma ta sihegwaeya, ‘Bada, patu 'ausalana 'ino tanoha mwalo 'usaweyaneya, ma togidega ta 'oinega 'awata ba'idanao sibwala mahemahetena?’

28“Ma tanoha taniwagana 'igwaeya, ‘Nuwana 'agu 'aleha 'aigeda 'isaweyaneya.’ Coinega 'ina topaihowao sigwaeya, ‘Togidega? Sawasawahina ma 'awataedi 'adabu yahuledi?’

29“Ma badaina 'igwaeya, ‘Tuwa! Walaguyawa, ma sibwala mahetena, weyahina 'eguma watoho 'awasina wadabu yahuledi, nuwana tupwana witi wete mahetenao wadabu 'aigededi. 30Ma tuta 'eli'eli hesi 'oina topaihowao yahegwaedi ma 'awasina sidomwa'autedi nugeta ta si'uinidi, ta 'oinega sigabu yahuledi, ma witi sidomwa'autedi ta 'igu hada 'e'ahaiya sihedodo.’”

Patu 'i'iuna ma 'ebe 'abiheseseha 'adi gwae hegehegedi

(Maki 4:30-32; Luke 13:18-21)

31Caigeda wete gwae hegehegedi 'i'ebwaediya, 'igwae, “Yehoba 'ina loina gide tuwa seyala* patuna 'aigeda loheya 'i'eweya ma tanoha 'idauniya. 32Seyala patuna 'i'iuna tuwa ma 'ina bwala mulina 'imadou gide 'aiwe, ma 'oinega bwasumowao sinaoma ta lahalahanao 'oidiya 'idi nehwa si'abidiya.”

33Caigeda wete gwae hegehegedi 'i'ebwaediya, 'igwae, “Yehoba 'ina loina gide tuwa pwalawa 'ana 'ebe 'abiheseseha*. Wahine 'i'eweya 'i'iuna tuwa ta pwalawa madouna ba'idana 'ihebweliyeya, 'oinega mabwaiyana 'iseseha.”

Gwae hegehegedi 'ina latu huhuna

(Maki 4:33-34)

34Yesu 'ina gwaeyedi gwae hegehegedi mabwaiyadi 'oidiyega boda 'ihe'itediya, weyahina tauna tuta mabwaiyana gwae hegehegediyega 'ihehe'ita tomota mabwaiyadi 'oidiya.

35Bewa 'oinega palopita 'ina gwae 'ilatuwa, beno mwalo hene 'ihepwaila nugeteya, 'igwae,

“Gwae hegehegediyega yahepwaila, ma yagwaene to'aha Yehoba 'idahweya bale'u 'ana paihowa hauhau 'oinega ma nige.”

Tosaweyana 'ina paihowa 'ana nuwasabwalena

36Ma Yesu boda 'i'ebesinediya ma 'iluhuwa hadai, ma 'ana tomuliyao sinaoma ta 'oina sigwaeya, “Gwae hegehegedi 'awata tanoha 'oina 'ana nuwasabwalena 'ulihasi, ma 'asanapu.”

37Coinega Yesu 'igwae, “Witi patuna 'ana tosaweyana taugu Loheyaiguina, 38ma tanoha beno bale'u mabwaiyana, ma witi beno taudi Yehoba 'ina loina 'ana tomuliyao, ma 'awata beno togalanaina 'ana topaihowao, 39ma 'awata 'ana tosaweyana beno tauna Seitani, ma tuta 'eli'eli beno tuta 'ana 'ebelosaloha, ma to'eli'eli taudi anelose, 40ma tuta 'ana 'ebelosaloha 'oina togala taudi tuwa gide 'awata sihegogonedi ma sigabu yahuledi.

41“Ma taugu Loheyaiguina 'igu aneloseyao yahesumanedi ma pui 'ana tohe'itao galadiyedi sihegogonedima ma 'igu 'ebeloina 'oinega 42siula latuhedi, 'aiwe 'ala'alasina 'alona. Beno tupwaina 'oina tomota sidou ma sihesala'i'ita muyamuya 'oinega.

43“Ma muliyetega tobwebwe'adi Tamadiu 'ina 'ebeloina 'alona si'asilala gide sinala.

“Ceguma taiya matenana gwae bewa 'ihesagohe.

Gwae hegehegedi 'etoi wete

44“Yehoba 'ina loina gide tuwa wasawasa goula* ma mane* madouna, mwalo bale'u 'aigeda 'oina sidahweya, ma 'aigeda loheya 'ilobeya, ta 'idahwa hileya, ma ma'ina yaliyaya 'itauya, ma 'ina tobwatobwa mabwaiyadi 'ihegimwaneyediya, ma 'adi maisao 'i'eweya ta bale'uina 'igimwaneya.

45“Ma wete Yehoba 'ina loina tuwa gide to'ahwa'une 'aigeda, mwali* 'ausala nuwanuwana. 46Coinega 'aigeda mwali 'ausala hedade 'ilobeya, ta 'oinega tauna 'ina bagi mabwaiyadi 'iulediya ma 'abehega mwaliina 'ausala hedade 'i'ewa.

47“Ma wete Yehoba 'ina loina gide tuwa gomana tomota siyahuweya holai, ma hali silahana ma hali silahana si'onediya, 48ta gomanaina 'imaha 'apu'apuwa ma silisiya 'oya'oya, ma simiyatoiya, ma silahana mabwaiyadi siwatahiya, ta silahana 'ausaladi gaeba 'oidiya silagudiya, ma silahana galadi siulediya. 49Gide wete, tuta 'ana 'ebelosaloha 'oina, aneloseyao sinaoma ma togala siwatahidi tobwebwe'ana 'oidiyega, 50ma siula latuwedi 'aiwe 'ala'alasina 'alona, ma 'oina sidou ma sihesala'i'ita muyamuya 'oinega.”

Tobwatobwa wasawasa hauhaudi ma miyamiyadi

51Coinega Yesu 'ihesilala 'oidiya, 'igwae, “Togidega gwae hegehegediyedi mabwaiyadi wasanapudiya?” Ma sihesagoha ma si'ahwa moisa, sigwae, “Cehe.” 52Ma 'ihegwaediya, “Bewa tuwa wasanapu 'abehega loina 'ana tohe'itao 'eguma Yehoba 'ina loina simanasama pwaiya, taudi gide tuwa 'aigeda hada toniwagana 'ina tobwatobwa tupwadi miyamiyadi ma tupwadi 'ehaudi ta mabwaiyadi 'alodiya wasawasa 'imiyamiya.”

MeNasaleta Yesu silogwahateya

(Maki 6:1-6; Luke 4:16-30)

53Yesu 'ina gwae hegehegediyedi 'ilosalohidiya, ma tupwa nage 'i'ebesinediya, 54ma 'ihila 'ina 'asa, ma 'idi Hada tapwalolo 'oina 'iluhuwa ma 'ihe'itediya, ma tomota nuwadi 'ihenainaida ta sigwaeya, “Loheya bewa ta'ehega 'oinega 'ina sanapu ma 'ina paihowa waiwaidi 'i'ewa'ewadi?”

55Ma wete sigwae, “Nuwana loheya bewa to'abi'abi hada natuna? Ma sinana Meli, ma tasinao Yemesa ma Yosepa ma Saimoni ma Yudasa, 56ma wete nuhunao mahetedao tamiyamiya. Ma togidega hede ta loheya bewa 'isanapu hedada?”

57Coinega silogwahateya. Ma Yesu 'ihegwaediya, 'igwae, “Palopitao 'adi he'asisi silobaloba hali 'asa 'oidiya. Ma taudi 'idi 'asa, bo 'idi hada, geya 'adi he'asisimo.”

58Eema Yesu nobwa 'ina paihowa waiwaidi geya baibaiwadi 'ipaihowadi, weyahina geya sihemisae.